Мэлылъфэгъум и 9-м Мыекъопэ къэралыгъо технологическэ университетым иконференц-зал адыгэхэм ятарихъ фэгъэхьыгъэ Iофыгъохэм зыщатегущыIэгъэхэ «Iэнэ хъурае» щыкIуагъ.

Тиадыгэ лъэпкъ тарихъ гъогоу къыкIугъэм епхыгъэ Iофтхьабзэр университетым апэрэу щызэхащэгъагъ. Докладхэм къяджэгъэ шIэныгъэлэжьхэм анэмыкIэу форумым хьэкIабэ къекIолIэгъагъ. Ащ хэлэжьагъэх Мыекъопэ технологическэ университетым иректорэу, профессорэу Блэгъожъ Хьазрэт, «Мамырныгъэм и Лигэ» ипрезидентэу ЦуукI Налбый, Адыгэ Республикэм гъэсэныгъэмрэ шIэныгъэмрэкIэ иминистрэ игуадзэу Алый Марыет, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу ПIатIыкъо Аслъан, тарихълэжьэу Бэрзэдж Нихьад, этнографэу Едыдж Бэтрай, АР-м икъэралыгъо телерадиокомпание итхьаматэу Бэгъушъэ Азэмат, республикэ гъэзетэу «Адыгэ макъэм» иредактор шъхьаIэу Дэрбэ Тимур, университетым икIэлэегъаджэхэр ыкIи студентхэр.

«Iэнэ хъураер» къызэIуихыгъ ыкIи зэрищагъ зэхэщэкIо комитетым итхьаматэу, тарихъ шIэныгъэхэмкIэ докторэу, профессорэу, Мыекъопэ технологическэ университетым тарихъымрэ правэмрэкIэ икафедрэ ипащэу Къудаикъо Светланэ. «Iэнэ хъураер» зэрэкIощт шIыкIэмрэ шIэныгъэлэжьхэр къызэджэщт докладхэм ятемэхэмрэ къекIолIагъэхэр ащ нэIуасэ зафешIыхэм ыуж гущыIэр ритыгъ технологическэ университетым иректорэу, техникэ шIэныгъэхэмкIэ докторэу, профессорэу Блэгъожъ Хьазрэт.

— Тигуапэ непэ зэхэтщэгъэ Iофтхьабзэм адыгэхэм ятарихъ идэлэжьэн зищыIэныгъэ щыщ шъыпкъэ хъугъэ шIэныгъэлэжь шIагъохэр зэрэхэлажьэхэрэр, — къыIуагъ Блэгъожъ Хьазрэт. — Шъуиушэтынхэм уасэ афэозыгъэшIырэр къыткIэхъухьэрэ ныбжьыкIэхэм щыIэныгъэм гъогу тэрэз щыхахынымкIэ ишIогъэшхо къызэрэкIорэр ары. Темыр Кавказым ыкIи Адыгэ Республикэм ащыпсэурэ цIыфхэр нахь зэпэблагъэ хъунхэм ахэр фэлэжьэщтых.

Нэужым адыгэхэм ятарихъ фэгъэхьыгъэ апэрэ докладыр къышIыгъ Адыгэ къэралыгъо университетым ипрофессорэу Шэуджэн Эмилие. Ащ иIофшIагъэ адыгэхэм ятарихъ дунэе ыкIи урысые историографием чIыпIэу ащиубытырэм фэгъэхьыгъагъ. Джащ фэдэу АКъУ-м идоцентэу Унэрэкъо Мирэ, гуманитар ушэтынхэмкIэ Адыгэ республикэ институтым идиректорэу КIыргъ Асхьад, шIэныгъэлэжьхэу Пэнэшъу Аслъан, Хьаткъо Самирэ, Мыекъопэ къэралыгъо технологическэ университетым тарихъымрэ правэмрэкIэ икафедрэ идоцентэу, тарихъ шIэны¬гъэхэмкIэ кандидатэу Саид Мусхаджиевыр, нэмыкIхэри докладхэм къяджагъэх.

ЕЛБЭШЭ Руслъан.

[b]Адыгэ Макъ[/b]