Гъэсэпэтхыд
Псэушъхьэмэ зы Къощыр кIэтIыргъо къахатIупщхьагъэшъ, къякIурэп, шъхьадж зэрэфэлъэкIэу мэцIацIэ. Пчэн къаигъэм еIо:
– Тазфагуи зэмызэгъыныгъэ горэ къимытаджэщтыгъэу арэп, ау мыдрэм уекIунэу амали Iэзэгъуи щыIэп. Тыдэ щыуцугъэми, тыдэ щытIысыгъэми, шIоир къыпэушышыкIы. ЗэрэцIыкIум емылъытыгъэу, тикъакъыр къощ шъыпкъэ ришIыкIын ылъэкIыгъ. ЕтIани, епIорэр хахьэрэп. Ренэу уемыпыджыщтымэ сшIэрэп.
Къаз пшъэ зандэу щырхэр зыуж ренэу итым ащ дырегъаштэ:
– Тэ псы тызщэшъорэм, зызщиттхьакIырэм ежь зыщеуцIэпIы. Ари Iофыжьа? Псышкошко закъоу тищагу дэчъырэр псынжъы ешIышъ, IухьапIи IусыпIи тимыIэу тыкъэнэ.
– Тыкъэнэ, тыкъэнэ, чэтхэр мэщынэ екIолIэнхэкIэ! - еIо Атэкъэ мэшIо сыджыми. - Пчэдыжьрэ бэрэ зэрэчъыерэр тинасып нахь, псы къэргъо шIагъор зыфэдэр тщыгъупшэжьыни.
ЦIэцIэныр зырагъажьэкIэ, Къощыр кIэтIыргъор зи ымыIоу, рэхьатэу къяплъэу, псынжъым хэлъы. Сыд Iо фаеми, нахьыжъых, нахь лъэшых. Ау псышкуашком къыхэкIыгъэу, шхапIэм кIоу къазщырхэм залъэгъукIэ:
– ШIои, шIои, шIои! ШхапIэм кIоным ыпэкIэ зитхьакIыгъэп, - аIозэ зылъежьэхэкIэ, атехъупкIэзэ, рефыжьэх:
– Шъори сыд шъузхэтыр!
Ар иушъхьагъоу нэмыкI псэушъхьэми закъыфегъазэ:
– Къэбзагъоу зыфашъуIорэм зи хъун хэлъэп. ТыдэкIи шъуплъ: зэкIэ джа шIои зыфашъуIорэм хэшIыкIыгъ. ГущыIэм пае, тикъакъыр шъуштэ. Къэсэгъэзэжьышъ, а шхын къабзэу къытатырэри шIоим къыхэкIэ. Арышъ, шIой щыIэп.
ЕтIани къыпедзэжьы:
– Джы сыцIыкIуми, ины сэри сыхъун!
Зымафэ Быгъу нэтIэ лъагэм ар зызэхехым, ыдагъэп:
– Ежь зынэсырэр шIои ешIышъ, шIой шыI Iоу ышIэрэп. Джырэ рапшIэу зыгорэ епэсыгъэн фае нахь, хахъомэ къэбгъэуцужьын плъэкIыщтэп, - ыIуагъ егупшыси.
Ащ ыуж псэушъхьэхэр бэрэ зэIушъэшъагъэх.
ЯтIонэрэ мафэм щэджэгъо нэстырым Къощыр кIэтIыргъор къакъырым къызеплъым, ылъэгъугъэм лъэшэу ыгу хигъэкIыгъ. Псышкуашкор уекIолIэн умылъэкIынэу шIыхьагъэ, къэлапчъэм къэрэгъулэу Пчэн къаигъэр Iут.
– ЗыптхьакIынэу е псы уешъонэу уфаемэ, къакIо, - ыIуагъ ащ. - НэмыкIэу укъысэмыкIуалI!
Къощыр кIэтIыргъом зиплъыхь-зиплъыхьи, ощх псылъэбанэм екIуи, ащи хъун щымыIэу зешIэм, тIыси гъыгъэ. ТIэкIурэ аущтэу щысыгъэу, нэпсэу чIыгум тефагъэм зытеIабэм, ыIапэ къыушIоигъ. Ар зелъэгъум, къэгушIожьи, щхыным ритIупщыгъ. Мэщхы, мэщхы, нэпсыр еу Iоу къечъэхы. Лъэбанэм псыр изы ешIыфэ щхыгъэ, ащ ыуж хэгъуалъхьи, пчыхьэ нэс хэлъыгъ.
Natpress