Дунаим щызэлъашIэрэ ФГУП-у «Фирма Мелодия» зыфиIорэмрэ Адыгэ Республикэм культурэмкIэ и Министерствэрэ зэгъусэхэу адыгэ лъэпкъ музыкэр зытетхэгъэ дискыр Москва къыщыдагъэкIыгъ. Аужырэ илъэсхэм фирмэм абхъаз, чэчэн, урыс, ермэл лъэпкъ музыкэр зытетхэгъэ дискхэри къыдигъэкIыгъэх.

Фирмэм адыгэ лъэпкъ музыкэр щытыратхэным фэшI Адыгэ Республикэм культурэмкIэ иминистрэу Чэмышъо Гъазыйрэ министерствэм иотдел ипащэу Шэуджэн Бэлэрэ зэхэщэн Iофыгъохэр зэрахьагъэх. Проектым гуетныгъэ ин хэлъэу дэлэжьагъ Урысыем икомпозитормэ я Союз хэтэу Гъот Аслъан. Фирмэм ифондрэ редакторым ипшъэрылъхэм япхыгъэ Iофыгъохэмрэ ащ ыгъэцэкIагъэх. Москва зэрэщыпсэурэр ыгъэфедэзэ, тилъэпкъ искусствэ дунаим нахьышIоу щашIэным фэшI егъэжьэпIэшIухэр ышIыгъэх.

Адыгэмэ ямузыкальнэ культурэ жанрэ зэфэшъхьафхэмкIэ къэп¬Iотэн зэрэплъэкIыщтыр дискым тетхагъэхэм къаушыхьаты. ЖъонакIом, натрыфыр зыпкIэрэм, мэкъуаом, нэмыкIхэми афэгъэхьыгъэ орэдхэр IофшIэным ехьылIагъэх. ШакIом, ощхым, ИлъэсыкIэм афэгъэхьыгъэхэри гъэшIэгъоных. Тарихъ, лIыхъужъ орэдхэр, нарт пщыналъэхэр нэмыкI музыкальнэ шапхъэхэм адештэх.

Дискым тетхагъэмэ ащыщ Шагудж Мыхьамодэ пщынэмкIэ къыригъаIощтыгъэ «Ислъамыер», жъыур ащ игъус. «Чэбэхъан изэфакIу», «Хьагъэуджым изэфакIу», «Мамрыкъом иорэд», «Абрэдж Нухьэ иорэд», «Сэрмафэр», «Нарт къашъор», «Саусырыкъорэ ТIотIрэщрэ зэрэзэзэуагъэхэр», нэмыкI лъэпкъ къэшъо орэдхэри дискым тыратхагъэх.

Къоджэшъэо Къадырхъанэ, Лъэцэрыкъо Кимэ, Шагудж Мыхьамодэ япщынэхэр зэрагъэбзэрабзэхэрэм, КIыкI Аслъанбэч, Мэрэтыкъо Аслъан, КIурэщэ Арсен шыкIэ-пщынэр «къызэрагъэгущыIэрэм», жъыокIо IэпэIасэхэм уядэIу пшIоигъомэ, Москва къыщыдагъэкIыгъэ дискыр IэпыIэгъушIу къыпфэхъущт. Литературэмрэ шIэныгъэмрэ япхыгъэ Iофхэр Унэрыкъо Рае ыгъэцэкIагъэх.
Дискэу къыдагъэкIыгъэм ипчъагъэ бэп. Ащ фэшI Интернетым къипхын плъэкIыщт.

Адыгэ Макъ