Иорданием ит Адыгэ шIушIэ Хэсэ гупчэм бэдзэогъум (июлым) и 15 Хэсашъхьэм хэхьащтхэр щыхадзынхэу щытыгъ, ау ар хъугъэп, цIыфхэу къекIолIагъэхэр икъугъэп. Хасэм иустав зэритымкIэ, ащ хэтхэм азыныкъом нахьыбэр хэдзынхэм хэлэжьэнхэ фэягъ.

Мы Iофым ехьылIагъэу Пщыдатэкъо Наурыз НатПреcсым къызэрэфиIотагъэу, хэдзынхэмкIэ зэнэкъокъу ин щыI, ащ пае хэдзынхэм хэлажьэрэ купхэм ащыщ горэм хэдзынхэр лъигъэкIотэнхэу дэлэжьэгъэныр ит. «Хэдзынхэр тхьэмэфитIукIэ ашIынэу рахъухьагъ - бэдзэогъум и 29», - ыIуагъ Наурыз.

КъэIогъэн фае, Адыгэ Хасэу Ирданием итыр 1932 илъэсым зэхащагъ, ащ илъэтегъэцонкIэ Хъурмэ Закарие лъэшэу дэлэжьагъ. Хасэм къутэмэ 12 иI, илъэситIу къэс ихасашъхьэ нэбгырэ 15 хадзы ыкIи ахэм хасэм итхьэматэ хадзыжьы.

Мы зыгугъу тшIыгъэ хэдзынхэмкIэ купытIу хъухэу щызэнэкъокъух. Купэу "ЫпэкIэ тызфакIорэр" зыцIэм хэдзынхэмкIэ нэбгырэ 15 къыгъэлъэгъуагъ, ахэмэ апэ итыр Азыкъо Мухамад. Купэу "ГъэкIэрэкIэныгъэ – хэхъоныгъ" зыцIэм нэбгырэ 15 къыгъэлъэгъуагъэмэ апэ итыр Къэрдэн Самир. НэмыкIэу ежь-ежьырэу зыкъыгъэлъэгъуагъ Едыдж Хусени.

Шъугу къэтэгъэкIыжьы, мы хасэм емыпхыгъэу джыри зыадыгэ организацие Иорданием ит – "Кавказ Адыгэхэм я ныбджэгъу Хас" зыфиIорэр. Ар политикэм ыкIи лъэпкъ проблемэ шъхьаIэхэм нахь афэгъэзагъэу мэлажьэ.