Полицием фэгъахьыгъэ къэралыгъо хэбзэгъэуцугъэм гъэтхэпэмазэм иапэрэ мафэ щегъэжьагъэу кIуачIэ иIоу хъугъэ. Мы мафэхэм а къулыкъум иIофышIэхэм зимычэзыу аттестацие акIунэу загъэхьазыры. ХэгъэгукIоцI IофхэмкIэ министерствэу Адыгеим щыIэм ипащэ игуадзэу Ермилов Александрэ ащ фэгъахьыгъэу гъэтхэгум и 22-м пресс-конференцие къытыгъ.
КъызэриIотагъэмкIэ, аттестациер гъэмафэм иапэрэ мазэ нэс кIощт. Ар гъогогъуищэу зэтефыгъ. Апэ Урысэем ипрезидент шъолъырхэм, хэкухэм япащэхэр, ягуадзэхэр, аттестацие зышIыщт комиссиехэм хэтыщтхэр ыгъэнэфэщтых. Нэужым аттестациер арагъэкIущт хэку полициемэ ахэт къулыкъухэм япащэ-гуадзэхэм. Ящэнэрэ кIогъумкIэ адрэ зэкIэ къэнагъэхэрэр ауплъэкIунхэу ары.
НепэрэмкIэ аттестацие Адыгеим щызышIыщт коммиссием, адрэ комиссиемэ афэдэу, цIыф зэхэхьэгъэ купмэ ялIыкIохэри рагъэблэгъэнхэ фае. Джыдэдэм ащ ыуж итых. Ау пэшIорэгъэшIэу къызэраIорэмкIэ, процент пшIыкIутфым нэсэу къулыкъур джы зыхьыхэрэм ащыщхэр аттестацием пхыракIыщтхэп. Тхьэмэтэинхэу ахэм ахэфэщт-ахэмыфэщтыр зыфэдизыр къаIуагъэп.
Шъугу къэтэгъэкIыжьы, ХэгъэгукIоцI IофхэмкIэ министрэу Адыгеим иIэгъэ Сысоев Александрэ аттестациер ыкIугъах, Воронеж хэкум иполицие пащэ щашIыгъ.
natpress