ХыIушъом щыпсэурэ шапсыгъэмэ я «Адыгэ Хасэ» ия VII-рэ зэфэс мэлылъфэгъум и 30-м Шъачэ щыкIуагъ. Краснодар краим иадминистрацие иIофышIэхэр, Абхъаз, Адыгэ, Къэрэщэе-Щэрджэс, Къэбэртэе-Бэлкъар республикэхэм къарыкIыгъэ лIыкIохэр ащ хэлэжьагъэх.
«Зэфэсым Iофыгъо шъхьаIэхэу къыщаIэтыгъэмэ ащыщ адыгабзэм изэгъэшIэн, нахь тэрэзэу къыпIощтмэ ар зэрэзэрамыгъэшIэжьырэр ары, - къеIуатэ зэфэсым къэбар Адыгэ Радиом иIофышIэу Нэджыкъо Маринэ. – ХыIушъо шапсыгъэхэр зыщыпсэурэ ТIуапсэ ыкIи псы Iушъо районхэм ахэхьэрэ псэупIибгъумэ адэт еджапIэмэ адыгабзэмкIэ, адыгэ литературэмкIэ егъэджэн сыхьатхэр зямыIэжьхэр бэшIагъэ».
КъызэриIуагъэмкIэ, мы мафэхэм яхъулIэу хыIушъом щыпсэурэ кIэлэеджакIомэ азыныкъом тIэкIу нахьыб рыгущыIэрэр, зэзгъашIэрэр ащ нахь макI, процент 20 ныIэп. Зэфэсым къекIолIэгъэ пстэуми зэдырагъэштагъ – еджапIэмэ адыгабзэ ачIэлъхьэгъэн фае, ау краим иадминистрацие иIофышIэхэм зэгурыIоныгъэ джырэкIэ къадагъотыгъэп.
Джыри зы Iофыгъоу зэфэсыр зытегущыIагъэхэмэ ащыщ – лъэпкъым зэрэхэмыхъорэр. Гъогухэм къатехъухьэрэ тхьамыкIагъохэм илъэс къэс ныбжьыкIэ нэбгырэ 100 пчъагъэ ахэкIуадэ. Къэзэрэщэхэрэр нахь макIэ мэхъу, сабыитIум нахьыбэ къызэрыхъухьэрэ унагъохэр IапэкIэ къэплъытэн плъэкIыщт. Мы Iофыгъохэр къызэрыкIохэп, къызежьагъэхэри джырэп. Ахэм ядэгъэзыжьынкIэ ялъэгъурэ хэкIыпIэхэр къызэрэугъоигъэхэм къыраIотыкIыгъ.
Пстэури къызфэкIуагъэр зы: адыгабзэкIэ зыщырагъэджэщтхэ сабый IыгъыпIэхэмрэ еджапIэхэмрэ, шапсэгъэхэр зэхэубытагъэу зыщыпсэущтхэ лъэпкъ район щыIэныр ары. Ащ къытегущыIагъэх шапсыгъэ Адыгэ Хасэм итхьэмэтэ гъэшIуагъэу ТIэшъу Мурдин, Адыгеим и Адыгэ Хасэ итхьэматэу Хьэпэе Арамбый ыкIы нэмыкIхэр.
Ау ащ емылъытыгъэу, Краснодар краим ипащэмэ зэрялъэIунхэу рахъухьагъэр – чIыпIэрыс лъэпкъ цIыкIухэм хабзэу апылъым тетэу хыIушъо шапсыгъэхэми къадэпсэунхэу ары. Ащ фэдэ хэбзэгъэуцугъэр УрысыемкIэ илъэсипшI фэдиз хъугъэу щыI, шапсыгъэхэр а хэбзэгъэуцугъэм къыхеубытэ, ау ежь хабзэр зыIыгъымэ къаблэкIэу къанэсырэп.
Зэфэхьысыжьхэм къакIэлъыкIоу джыри зы Iоф зэфэсым щыхагъэкIыгъ. ХыIушъо шапсыгъэхэм я Адыгэ Хасэ итхьэматэу аужыпкъэрэ илъэсипшIым мы пшъэрылъыр зыгъэцакIэщтыгъэ Чачыхъу Мэджыдэ кIэрыкIэу хадзыжьыгъ.
natpress