РафтингымкIэ Урысыемрэ Къыблэ шъолъырымрэ ячемпионатэу «Интерралли Шъхьагуащ – 2011»-рэ зыфиIорэр Адыгэ Республикэм щыкIуагъ. Ащ изэфахьысыжьхэмкIэ Адыгеим ихъулъфыгъэ спортсмен купым ящэнэрэ чIыпIэр ыубытыгъ, бзылъфыгъэхэр яплIэнэрэу хъугъэх.

«Мы зэнэкъокъухэр Адыгэ Республикэм щызэхэщэгъэныр шэнышIу хъугъэ, - къеIуатэ Адыгэ радиом иIофышIэу ГутIэ Санет. - Илъэс къэс къошъо фынымкIэ спортсмен анахь дэгъухэр псыхъоу Шъхьэгуащэ дэжь къыщызэрэугъоих, чемпионы цIэр къыдэхыгъэным фэбанэх».

Спортсмен хъулъфыгъэ купхэм ащыщэу къалэу Красноярскэ къыикIыгъэм апэрэ чIыпэр къыдихыгъ. ЯтIонэрэ чIыпIэр фагъэшъошагъ къалэу Рязань икуп. Адыгэ Республикэм икомандэ ящэнэрэ хъугъэ.

Бзылъфыгъэ купмэ азыфагу анахь лъэшэу къычIэкIыгъэхэр къалэу Красноярскэ къыкIыгъэхэр ары. ЯтIонэрэ ыкIи ящэнэрэ чIыпIэхэр къалэу Рязань икупитIумэ зэфагощыгъ.

КъэIогъэн фае, Адыгэ Республикэм ибзылъфыгъэ купэу яплIэнэрэ чIыпIэр зытефагъэр иапэрэу мыщ фэдэ зэнэкъокъу инхэм зэрахэлажьэрэр. Ащ дакIоу къыхэгъэщыгъэмэ хъущтыр, мыщ зэужэу спортсмен куп 17 мызыгъэгурэм щызэIукIэгъагъ.

ПэшIорэгъэшIэу къызэраIорэмкIэ, къэкIорэгъым щегъэжьагъэу Адыгэ Республикэм ыкIи Шъхьэгуащэ джыри зы зэнэкъокъу ин щызэхащэщт.

natpress