«Зэкъошныгъ» Мыекъуапэ - «Славянский» Славянск-на-Кубани - 1:1. ЖъоныгъуакIэм и 3-м Мыекъуапэ щызэдешIагъэх. Зезыщагъэхэр: С. Погарченко - Шахты, Р. Дудов - Кисловодск, П. Егоров - Ростов-на-Дону. Къэлапчъэм Iэгуаор дэзыдзагъэхэр: Хьабэчыр - 31 (пенальтикIэ) - «Зэкъошныгъ». Колпаков - 78 – «Славянский».

ЕшIэгъур зэрэкIуагъэр зэфэпхьысыжьмэ, командэхэр илъэс зэнэкъокъум икъоу фэхьазырхэп. «Зэкъошныгъэр» бэрэ ыпэкIэ илъыщтыгъ, ау къэлапчъэм Iэгуаор дидзэн ылъэкIыщтыгъэп. Къэлэпчъэ бгыкъум Iэгуаор тифутболистхэм ащыщ тыригъэфагъ. А. Датхъужъыр, А. Нартиковыр, нэмыкIхэри текIоныгъэм фэбэнагъэх шъхьае, тагъэгушIон алъэкIыгъэп.

ХьакIэхэр дэеу ешIагъэхэп. Командэр ауж къинэрэмэ ащыщ мыхъущтэу зыкъигъэлъэгъуагъ. Пчъагъэр зэфэдэу зэраухыгъэм тигъэгумэкIэу пресс-зэIукIэм тыкIуагъ.

Пресс-зэIукIэр

- ТекIоныгъэм тэ нахь тыпэблэгъагъ, - къыIуагъ «Славянскэм» итренер шъхьаIэу Эдуард Саркисовым. - Мыгъэ пшъэрылъ шъхьаIэу тиIэр апэ ит командипшIмэ тахэфэныр ары. «Зэкъошныгъэм» бэшIагъэп зызиугъоигъэр, командэм ущыгугъыным пае уахътэ ищыкIагъэу сэлъытэ. Кобл Анзор дэгъоу сэшIэ. Тызэгъусэу «Черноморец» Новороссийскэ тыщешIэщтыгъ...

- ЕшIэгъум хэдгъэлэжьэщт футболистхэр тфикъухэрэп, - къытиIуагъ Кобл Анзор. - Василькиныр сымаджэу зэIукIэгъум хэдгъэлэжьагъ. Нартиковыри сымадж, ешIапIэм къихьанэу тыщыгугъыщтыгъэп. НэмыкI футболистхэу ешIапIэм къисымыгъэхьагъэхэм яшIуагъэ къагъэкIон, зэIукIэгъур нахь гъэшIэгъон ашIын алъэкIыщтыгъэу слъытэрэп. ТиухъумакIохэр хэукъохи, хьакIэмэ тикъэлапчъэ Iэгуаор къыдадзагъ.

Кобл Анзор зэрилъытэрэмкIэ, бэкIэ зыщыгугъырэ футболистэу «Зэкъошныгъэм» хэтыр макIэ. Тикомандэ пшъэрылъэу иIэр ыгъэцэкIэным пае футболисти 5-6 къырагъэблэгъэн фае. «Зэкъошныгъэм» непэ футбол гъэшIэгъон къыгъэлъэгъон, апэ итхэм ахэуцон ылъэкIыщтэп. Мэзищ зытешIэкIэ зэхъокIыныгъэхэр командэм иешIакIэ фэхъущтых...

Купым хэтхэр зэрешIагъэхэр: «Алания-Д» - «Энергия» - 3:1, СКА - «Мэщыкъу» - 1:0, «Динамо» - «Торпедо» - 4:3, «Олимпия» - «Митос» - 4:0, «Ангушт» - «Астрахань» - 0:1, «Биолог» - «Кавказтрансгаз» - 0:0, «Ротор» - «Таганрог» - 1:0, «Дагдизель» - «Фаюр» - 0:2.

ЧIыпIэхэр зэтэгъапшэх:

1. «Астрахань» - 9

2. «Ротор» - 7

3. «Алания-Д» - 6

4. СКА - 6

5. «Славянский» - 5

6. «Фаюр» - 5

7. «Биолог» - 5

8. «Кавказтрансгаз» - 5

9. «Олимпия» - 4

10. «Торпедо» - 3

11. «Мэщыкъу» - 3

12. «Динамо» - 3

13. «Таганрог» - 3

14. «Дагдизель» - 3

15. «Митос» - 3

16. «Зэкъошныгъ» - 2

17. «Ангушт» - 0.

ЖъоныгъуакIэм и 8-м Урысыем футболымкIэ и Кубок къыдэхыгъэным фэгъэхьыгъэ ешIэгъухэр щыIэщтых. «Зэкъошныгъэр» тикъалэ щыIукIэщт командэу «Биологым».

Сурэтыр «Зэкъошныгъэмрэ» «Славянскэрэ» язэIукIэгъу къыщытырахыгъ.

ЕМТIЫЛЪ Нурбый.

adygvoice.ru